Дс, 29/11/2021 - 14:15
2021 жылғы 29 қарашада Нұр-Сұлтан қаласы Сарыарқа ауданының №2 аудандық соты абайсызда адам өліміне әкеп соққан тұтынушылардың өмірі мен денсаулығы қауіпсіздігінің талаптарына жауап бермейтін қызметтер көрсеткені үшін Т. - ға қатысты айыптау үкімін шығарды (ҚК 306-бабының 3-бөлігі).
Соттың анықтағаны:
Т. "Астана" спорт кешенінің жүзу бойынша нұсқаушысы ретінде бассейнге келушілердің қауіпсіздігі бойынша өз міндеттерін тиісінше орындамауы салдарынан жәбірленуші Е.-нің суға батып кетіп, қайтыс болуына жол берген.
Сот отырысында прокурор Т. - ға 5 жылға бас бостандығынан айыру жазасын тағайындауды сұрады. Жәбірленушілер сотталушыға барынша ұзақ мерзім - 8 жыл бас бостандығынан айыруды сұрады.
Сотталушы өз кінәсін мойындамады, оның әрекеттерінде қылмыс құрамының болмауына байланысты істі тоқтатуды сұрады.
Сот жәбірленушіге медициналық көмек көрсету шараларын кінәсін және жазасын жеңілдететін мән-жай деп таныды. Оның кінәсі мен жазасын ауырлататын жағдайлар анықталған жоқ.
Жазалау бойынша шешім
ҚК-нің 306-бабының 3-бөлігінде көзделген қылмыстық құқық бұзушылық абайсызда жасалған қылмыстарға жатады. Ол бойынша санкция 4 жылдан 8 жылға дейінгі мерзімге бас бостандығынан айыру түріндегі жазаны көздейді. Абайсызда жасалған қылмыстар бойынша жазаны өтеу қауіпсіздігі барынша төмен мекемелерде тағайындалады.
Жеңілдететін мән-жайлар болған және ауырлататын мән-жайлар болмаған жағдайда жаза мерзімі ауырлығы орташа қылмыстар үшін жазаның ең жоғары мерзімінің ½ - ден аспауы тиіс.
Бұл іс бойынша жаза 4 жылдан аспауы керек.
Сот сотталушының жеке басын, жәбірленуші тараптың ұстанымын ескере отырып, Т. - ға 4 жылға нақты бас бостандығынан айыру жазасын тағайындады.
Зардап шеккен тараптың пайдасына бассейн иесінен "Арнайы қамтамасыз ету орталығы" ЖШС-нен моральдық зиян үшін өтемақы 10 млн. теңге өндіріп алынды.
Сот үкімі заңды күшіне енген жоқ.