Ел Президенті Нұрсұлтан Назарбаевтың мемлекеттің жаңа саяси бағытын айқындайтын «Қазақстан – 2050» стратегиялық құжатында тәуелсіз, қуатты, дербес мәртебелі сот билігін орнықтырудың жаңа мақсаттары мен міндеттері айқындалған.
Онда соттар мен судьяларды одан әрі мамандандыру, мамандандырылған соттардың жұмысын жандандыру, бұқара халықтың сот төрелігіне деген сенімін арттыру, жаңадан тағайындалған судьялардың біліктілігін көтеру, соттардың материалдық-техникалық базасын жаңарту, соттардың ашықтығы мен объективтілігін айқындайтын электронды инновациялық жүйені енгізу сынды өзекті мәселелер қамтылған.
– Астана қалалық соттарының өткен жылғы қызметін талдау сот төрелігін жүзеге асыру көрсеткіштерінің жақсарғанын көрсетті. Мемлекеттің ең қымбат қазынасы – адамның өмiрiн, құқықтары мен бостандықтарын қорғайтын қуатты заңдар мен әділ сот төрелігі болса, елорда соттары осы межені өз деңгейінде атқарып келеді деген сенімдемін, – деді бізге Астана қалалық сотының Кеңсе басшысы Ренат Тауымбеков. – Мемлекет басшысы ұсынған Ұлт жоспарының 20 қадамында: «Барлық сот процестеріне бейне және таспаға жазу шараларын міндетті түрде енгізу. Судьяның бейне жазуды тоқтатуға немесе аудио жазу материалдарын редакциялауға мүмкіндігі болмауы тиіс» деп нақтыланған. Тапсырманы орындау үшін «электронды үкімет» бағдарламасы шеңберінде Астана қаласының соттары электронды технологияға көшірілді. Мәселен, қазіргі уақытта Астана қаласының барлық соттары аудио және бейне жазу құрылғыларымен толық жабдықталған. Кез келген сот процесі аудио және бейнетаспаға түсіріліп, бірден тараптардың қолына ұсынылады. Бейнетаспаны монтаждауға немесе басқа әрекеттерге жол берілмейді. Өйткені сот процесі басталған бетте бейне жазу құрылғысы іске қосылып, сот процесінің басталған және аяқталған уақытын толық көрсетіп тұрады. Бұл сот процестерінің уақытылы басталуына ықпал етіп, сот ісінің созылуының алдын алады және сот хаттамаларының компьютермен терілуін тоқтатады.
Р. Тауымбековтың айтуынша, заманауи озық технологиялардың қолданылуы судьялар мен сот мәжілісі хатшыларының жүктемесінің жеңілдеуіне, сот отырысының хаттамасындағы ескертулерді азайтуға, сот ісін жүргізу рәсімін жеңілдетуге ықпалын тигізіп, халықтың сотқа қолжетімділігіне түрткі болады.
– Сандық электронды қолы бар азаматтар талап арыздарын, электронды құжат түріндегі сот хаттамаларын www.egov.kz порталы және www.astana.sud.kz арқылы жіберу мүмкіндігіне ие. Сот өндірісіне қабылданған арыздың қандай көлемде, қай дәрежеде қаралып жатқандығы туралы мәліметті елордалықтар қалалық соттың ресми сайтынан біле алады. Сол сияқты сотқа қатысушыларға істің жүру барысы туралы ақпарат алу және сот актілері жайында қажетті мағлұматпен танысу мүмкіндігі берілген.
Барлық жергілікті соттар «Е-суд» «электрондық үкімет» порталын құрып, ел азаматтарының электрондық талап арыз беруіне, электрондық түрдегі сот хаттамасын алуына мүмкіндік жасап келеді, – деді қалалық соттың Кеңсе басшысы.
Оның мәлімдеуінше, бүгінгі таңда «Сот кабинеті» сервисі іске қосылып, халыққа қызмет көрсетіп жатыр. Ол Астана қалалық сотының интернет-ресурсына орналасқан.
«Сот кабинеті» онлайн электронды құжат айналымы азаматтар мен ұйымдардың сот органдарымен электронды өзара іс-қимылының жаңа тәсілі. Сервис арқылы өтініш, арыз, шағым және электрондық түрдегі өтінімдерді әзірлеу, мемлекеттік алымдарды онлайн түрінде төлеу, деректерді сақтау және жіберу операцияларын іске асырады. Тұтынушы өзіне ыңғайлы кез келген уақытта сот құжатын қарап, істің тарихымен, деректермен танысып, сот актісін басып шығара алады.
«Сот құжаттарымен танысу» сервисі логин, пароль, ЖСН-ді енгізу арқылы электронды сот құжаттарын көруге арналған. Логин мен парольді сот процесіне қатысушы азамат өзінің ұялы телефонына немесе электронды поштасына келіп түскен электронды хабарлама арқылы біле алады. Жолдаған өтініші тіркелгеннен кейін азаматтар оның тіркелгені туралы талон мен электронды хабарламалар туралы келісімге ие болады.
Сот процесіне қатысушы мен өзге тарапқа сот тыңдалымы туралы талон жолданады. Жедел ақпараттандыру мақсатында сот процесіне қатысушыларға судьяның электронды-цифрлық қолтаңбасы қойылған сот актілерінің шыққаны туралы SMS жіберіледі. Сервистегі электронды сот құжаттарын көруге, сақтауға және жүктеп алуға болады. Бұған қоса, сервис сот кеңселері қызметкерлеріне пошталық хабарландырудан бас тартқан барлық электронды хабарламаларды шолып отыруға мүмкіндік береді» деді Р.Тауымбеков.
Сот өкілінің пікірінше, сот жүйесінің конституциялық дербестігі мен тәуелсіздігін нығайтуда, сот билігінің беделін жоғарылатуда, әділ сот төрелігін жүзеге асыруда соттарды материалдық-техникалық және заманауи ақпараттық технологиямен қамтамасыз ету аса маңызды мәселе. Себебі, электронды инновациялық жүйе сот процедураларының ашықтығы мен айқындығын, сот ісін жүргізудің тиімділігі мен объективтілігін артыра түседі.
«Сот кабинеті» және «Сот құжаттарымен танысу» сервисі бұқара халықтың кең қолданысында болып, адвокаттардың, судьялар мен сот мамандарының тиімді жұмыс істеуіне, азаматтардың құқықтық мәдениетінің жетілуіне, олардың өздерінің конституциялық құқықтарын еркін пайдалануына септігін тигізеді. Ұлттық сот өндірісін дамытудың маңызды бағыттары 2020 жылға дейінгі Құқықтық саясат тұжырымдамасында айқындалған. Сондықтан міндеттелген тапсырмалардың уақытылы орындалуы, судьялар мен сот мамандары біліктілігінің артуына ықпал етеді.
– Бүгінде сот әділдігін жүзеге асырудың сапасы жақсарып, халықтың сотқа деген сенімі артып келеді. Әділ сот төрелігін атқаруда, азаматтардың құқықтарын, бостандықтарын, заңды мүдделерін қорғауда және сот жүйесінің әрі қарай серпінді дамуында Астана қалалық соты өз үлесін қоса береді, – деп түйді ойын Р. Тауымбеков.